Legjenda e Milanit, Franco Baresi, ka thënë se mirë që shortin i çerekfinales së Europa League ka evituar skuadra të mëdha, por nuk duhet nënvlerësuar as Slavia Prague.
“Evituam Liverpulin. Megjithatë, Slavia Praga është një ekip solid dhe fizik, prandaj duhet ta respektojmë nëse duam të shkojmë sa më larg”, është shprehur ish-mbrojtësi i njohur italian.
Baresi ka theksuar rëndësinë e ambicieve për skuadrën e tij. “Milani duhet të jetë gjithmonë ambicioz, ne duhet të bëjmë maksimumin për të ecur sa më shumë përpara. Kur jemi mirë, mendoj se mund të konkurrojmë me këdo. E këtë duhet ta besojmë të gjithë”, është shprehur ai.
Baresi ka pasur vërejtje për repartin mbrojtës të Milanit.
“Kur pëson gola, të gjithë duhet të krijojnë më shumë intensitet në fushë, sepse golat e pësuar janë shpesh rezultat i një reagimi që ka ardhur shumë vonë. Për të përfituar sa më shumë në fazën e mbrojtjes duhet një frymë sakrifice nga të gjithë”, ka thënë ai.
