Lëvizja Vetëvendosje nëpërmjet një postimi ka kritikuar Prokurorinë Speciale të Kosovës për mos ngritje të aktakuzave për sulmin e 24 shtatorit nga grupet terroriste serbe në Banjskë.
Në reagimin e tyre në Facebook, përmenden provat e shumta të grumbulluara nga ky sulm.
“Me 24 shkurt u bënë 5 muaj nga sulmi terrorist i organizuar nga Serbia me qëllim aneksimin e veriut. Deri tash janë shpalosur qindra prova dhe zbuluar pothuajse të gjithë pjesëmarrësit në atë sulm. Por, edhe pas gjithë këtyre muajve dhe provave ende nuk ka asnjë aktakuzë nga Prokuroria Speciale e Kosovës për këtë rast”, ka shkruar LVV.
Kujtojmë se rreshteri i Policisë së Kosovës, Afrim Hoti, mbeti i vrarë nga sulmet e organizuara nga grupet terroriste serbe në veri të vendit më 24 shtator të vitit të kaluar.
