Kreu i PDK-së, Memli Krasniqi, përmes një postimi në Facebook, ka shkruar se PDK po rritet, po fuqizohet dhe po rikthehet.
Këtë vlerësim Krasniqi e ka bërë gjatë takimit me kryesinë e kësaj partie në Zvicër si dhe kryetarët e nëndegëve në këtë shtet, ku i ka falënderuar për punën dhe angazhimin e tyre në shpalosjen e vizionit të PDK-së për të ardhmen e Kosovës.
“Strukturat e PDK-së, kudo nëpër Zvicër – që janë shembull i organizimit në mërgatë, nga shtatori e deri më tani kanë zhvilluar mbi 100 takime dhe kanë organizuar tubime me bashkatdhetarët duke e shumëfishuar mbështetjen e mërgatës për PDK-në”, ka shkruar Krasniqi.
Në pajtim me vendimin e marrë në mbledhjen e fundit të Këshillit Drejtues, Krasniqi tha se prioritet i PDK-së është mobilizimi i të gjitha strukturave partiake për zgjedhjet parlamentare.
“Në pajtim me vendimin e marrë në mbledhjen e fundit të Këshillit Drejtues, prioritet i yni është mobilizimi i të gjitha strukturave partiake për zgjedhjet parlamentare, për t’i dhënë fund keqqeverisjes, për ta rikthyer besimin e qytetarëve dhe për t’i dhënë vendit një Qeveri të re që e rikthen Kosovën në binarët e zhvillimit, integrimit dhe perspektivës për të gjithë”, ka shkruar i pari i PDK-së. /Kosovatimes/
