Zëvendësministri i Punëve të Jashtme dhe Diasporës, Kreshnik Ahmeti, priti në takim Përfaqësuesin Special të Qeverisë Federale të Gjermanisë për Vendet e Ballkanit Perëndimor, Manuel Sarrazin të cilin e ka njoftuar me aktivitetet aktuale në lidhje me anëtarësimin e Kosovës në organizata ndërkombëtare, me theks të veçantë në Këshillin e Evropës.
Në njoftimin për media bëhet e ditur se Ahmeti e Sarrazin kanë biseduar për rrugën evropiane të Republikës së Kosovës si dhe mbi bashkëpunimin rajonal.
Zëvendësministri Ahmeti e ka falënderuar Sarrazin për mbështetjen e Gjermanisë dhe e nënvizoi rëndësinë e suksesit në këto procese edhe për paqen dhe stabilitetin në rajon. /Kosovatimes/
