Duke marrë si referencë protestat e fermerëve në Bruksel, Ervin Resuli, i pari i veterinerëve shqiptarë, tha se nuk është asgjë më pak se një vijë e kuqe midis atyre që qeverisin dhe bëjnë politika dhe atyre që janë viktima të politikave të tyre të gabuara.
“Shembulli që vjen nga zemra e demokracisë tregon se, kur kapërcehen këto vija të kuqe, nuk mbetet më rend dhe hapësirë për negociata, por lind një lloj lufte brenda vetes për të vendosur ekuilibra që të gjithë të jetojnë të lumtur”, shkruan ai në profilin e tij në facebook.
Paralelizmi midis fermerëve europianë dhe atyre shqiptarë sipas tij, tregon qartë se ne akoma nuk jemi të gatshëm të quhemi qytetarë të Europës.
“Si mund të jemi, kur ende nuk dimë të mbrojmë interesat tona, të kërkojmë të drejtat tona, të organizohemi në organizata që nxisin ndryshime politike dhe ligjore? Si mund të quhemi europianë kur ende mbizotëron mentaliteti ”ç’më duhet mua”, nëse fermerët janë në vështirësi dhe të pafuqishëm, çfarë të themi për qytetarët e tjerë?”, pyet ai.
Shembulli brutal sipas tij, vjen nga ata që kanë vite të tëra qytetari, por tek ne, situata duket ndryshe.
“Ky kontrast tregon qartë se ka ende shumë për të bërë për të arritur atë nivel të bashkëjetesës dhe të drejtave që shijojnë qytetarët në pjesë të tjera të Europës. Duhet të mësojmë të mbrojmë të drejtat tona, të organizohemi më mirë dhe të bëjmë zërin tonë të dëgjohet. Vetëm atëherë mund të fillojmë të shohim ndryshime të vërteta dhe të ndihemi pjesë e vërtetë e Europës, duke jetuar në një shoqëri që respekton të drejtat dhe nevojat e të gjithë qytetarëve të saj”, tha ai. /Kosovatimes/
