Li Hui, i cili vizitoi Evropën në maj të vitit të kaluar, do të shkojë gjithashtu në Poloni, Francë dhe Gjermani për të diskutuar konfliktin në Ukrainë, tha Mao Ning, zëdhënëse e Ministrisë së Jashtme kineze.
Kina është kritikuar në Perëndim për qëndrimin e saj ndaj luftës në Ukrainë.
Edhe pse bën thirrje për integritetin territorial të të gjitha vendeve, ku përfshihet edhe Ukraina, Kina kurrë nuk e ka dënuar publikisht ofensivën ruse dhe as nuk i ka bërë thirrje Moskës që të tërheqë trupat e saj nga Ukraina.
Që nga fillimi i pushtimit rus të Ukrainës, “ne kurrë nuk kemi hequr dorë nga përpjekjet për të promovuar paqen dhe për të inkurajuar negociatat”, tha Mao Ning, duke përsëritur qëndrimin e Kinës në një konferencë të rregullt shtypi.
Kina dhe Rusia ndajnë një dëshirë për të kundërshtuar atë që ata e quajnë hegjemoninë amerikane. Në këtë drejtim, dy vendet fqinje janë afruar politikisht dhe ekonomikisht në dy vitet e fundit.
