Ministri i Mbrojtjes, Ejup Maqedonci, ka pritur sot në takim anëtarët e Komitetit të Sigurisë dhe Mbrojtjes të Bundestagut gjerman.
Maqedonci tha se gjatë takimit u diskutua për situatën e sigurisë në vend dhe kapacitetet aktuale që ka FSK-ja për të garantuar mbrojtjen territoriale të Kosovës.
Ministri theksoi kërcënimin që paraqesin bazat ushtarake të Serbisë, të vendosura përgjatë kufirit me Kosovën, për stabilitetin e vendit dhe rajonit.
“Në këtë takim produktiv e njoftova kryetaren e Komitetit, Marie Agnes Strack Zimmermann dhe anëtarët e këtij komiteti mbi situatën e sigurisë në vend, kërcënimin që paraqesin bazat ushtarake të Serbisë të vendosura përgjatë kufirit me Kosovën për stabilitetin e vendit dhe rajonit, gjë që duhet të ishte shqetësim për gjithë faktorin ndërkombëtar, ndërsa i informova dhe për kapacitetet aktuale që FSK ka për të garantuar mbrojtjen e tërësisë territoriale të Republikës së Kosovës dhe jetës së qytetarëve tanë”, ka shkruar Maqedonci në Facebook.
Më tej, ministri tha se gjatë takimit ka ritheksuar se synimi i shtetit të Kosovës është anëtarësimi në NATO.
“Ritheksova se synimi ynë si shtet është anëtarësimi në NATO, sipas standardeve të së cilës aleancë po vazhdojmë implementimin e Planit Gjithëpërfshirës të Tranzicionit, ndërtimin e kapaciteteve profesionale dhe operacionale të ushtrisë tonë” .
Maqedonci ka shprehur mirënjohjen e Kosovës për mbështetjen e Gjermanisë, duke përmendur edhe praninë e shtuar të trupave gjermane në kuadër të KFOR-it.
“Shpreha mirënjohjen time anëtarëve të komitetit për mbështetjen e gjatë të shtetit gjerman ndaj Republikës së Kosovës, praninë e shtuar të trupave gjermane në kuadër të KFOR-it, si dhe angazhimin e këtij komiteti në drejtim të thellimit të bashkëpunimit ndërmjet vendeve tona në fushën e sigurisë dhe mbrojtjes, si dy shtete që ndajmë interesa të përbashkëta. Ky partneritet do të jetë i gjatë dhe i pashkëputshëm”, ka shkruar Maqedonci. /Kosovatimes/
