Numri i të porsalindurve në Korenë e Jugut në vitin 2023 ishte më i ulëti që nga viti 1970, kur filluan të mbaheshin statistika, u njoftua sot në Seul.
“Numri i fëmijëve të porsalindur në vitin 2023 ishte 230,000, që është 7.7 për qind më pak se në vitin 2022”, u tha gazetarëve Lim Jung-il nga Agjencia e Statistikave të Koresë së Jugut.
Në vitin 2023, lindshmëria ose numri i të porsalindurve për 1000 banorë ishte 4.5 krahasuar me 4.9 në 2022, sipas të dhënave paraprake.
Për të ruajtur popullsinë aktuale (51 milionë), gratë do të duhet të lindin mesatarisht 2.1 fëmijë gjatë jetës së tyre, por në vitin 2023 kjo do të binte në 0.72.
Me atë ritëm, popullsia e Koresë së Jugut pothuajse do të përgjysmohet në 26.8 milionë në vitin 2100, sipas Institutit për Metrikat dhe Vlerësimin e Shëndetit në Universitetin e Uashingtonit në Seattle, SHBA.
Shteti i Koresë së Jugut ka shpenzuar miliarda euro për të inkurajuar lindjen e fëmijëve, duke përfshirë pagesën e shtesave, mbështetjen e shërbimeve të kujdesit për fëmijët dhe ndihmën me trajtimet e infertilitetit.
Ekspertët thonë se ndikon edhe fakti që gratë kanë një ditë pune të dyfishtë, kur kthehen nga puna shpesh marrin përsipër detyrat e pastrimit të shtëpisë dhe të ndihmës së fëmijëve në studimet.
Një numër vendesh të zhvilluara po luftojnë gjithashtu me nivelet e ulëta të lindjeve, veçanërisht Japonia fqinje, ku numri i lindjeve ra në vitin 2023 për të tetin vit radhazi, sipas të dhënave të publikuara dje.
