Gjykata Themelore në Prishtinë, Departamenti i Përgjithshëm Penal ka vendosur lidhur me kërkesën e Prokurorisë Themelore në Prishtinë֝ për caktimin e masës së paraburgimit kundër të pandehurës Y.B për shkak të veprës penale “Rrezikimi i trafikut publik”, nga neni 370, paragrafi 9, lidhur me paragrafin 6 dhe 1, të Kodit Penal të Republikës së Kosovës.
Përmes një komunikate për medie bëhet e ditur se gjyqtari i procedurës paraprake ka aprovuar si të bazuar kërkesën e Prokurorisë Themelore në Prishtinë për caktimin e masës së paraburgimit, kundër të pandehurës Y.B dhe të njëjtës i është caktuar masa e paraburgimit në kohëzgjatje prej 1 (një) muaji.
“E pandehura Y.B me datë 26.02.2024 në Prishtinë dyshohet se nga pakujdesia, derisa ishte duke ngarë veturën e saj, kishte vepruar me kundërshtim me rregullat e trafikut rrugor, ashtu që duke mos përshtatur shpejtësinë e automjetit dhe kushteve të rrugës, në mënyrë të pa kontrolluar e godet shtyllën e semaforit dhe nga goditja semafori rrëzohet dhe godet këmbësorin SH.H, me çka tani të ndjerit i kishte shkaktuar lëndime të rënda trupore, ku si pasojë e lëndimeve, tani i ndjeri SH.H kishte ndërruar jetë”, thuhet në komunikatë .
Tutje bëhet e ditur se kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë. /Kosovatimes/
