Qeveria gjermane ka përgatitur një plan për një sulm të mundshëm rus në vend, i cili do të përbëhet nga katër faza, shkruan Bild , duke cituar një dokument 13 faqesh të titulluar “Analiza e rrezikut të mbrojtjes civile”.
Në fazën e parë, Rusia pritet të nisë një fushatë dezinformimi në media dhe rrjetet sociale për të arritur “një ndarje mes popullatës, destabilizimin e shoqërisë dhe minuar besimin në demokracinë e lirë”. Ky proces do të shoqërohet me sulme kibernetike ndaj termocentraleve, digave dhe objekteve të tjera të rëndësishme. Për shkak të sekretit të operacioneve, veprimet individuale do të jetë e vështirë t’i atribuohen në mënyrë të qartë Rusisë, thuhet në dokument.
Në fazën e dytë, Rusia do të përqendrojë trupat pranë kufijve të NATO-s dhe vendet e aleancës do të forcojnë kontigjentin kufitar në përgjigje të kësaj. Numri i sulmeve kibernetike dhe sabotimeve do të rritet për të vonuar lëvizjen e ushtrive të NATO-s. Rusia gjithashtu do të përpiqet të çaktivizojë satelitët hapësinorë. Sulmet ndaj reaktorëve bërthamorë, impianteve kimike dhe strukturave hidraulike në Gjermani nuk mund të përjashtohen.
Gjatë fazës së tretë, Rusia do të fillojë të kryejë sulme të synuara duke përdorur armë konvencionale dhe jokonvencionale. Sulmet do të godasin “objektivat në territorin e Republikës Federale të Gjermanisë”, thekson dokumenti. Në të njëjtën kohë, një numër i madh i satelitëve hapësinorë do të shkatërrohen.
Në fazën e katërt të konfliktit, trupat ruse do të depërtojnë deri në kufijtë gjermanë. Operacionet luftarake do të zhvillohen në territorin e vendit, në ajër dhe në det. Për më tepër, lufta do të përhapet në hapësirë, ku për herë të parë do të ndodhë një “konflikt në shkallë globale”.
Nëse Rusia sulmon Gjermaninë, ky do të jetë një “ndryshim themelor në situatën e sigurisë për të gjithë Evropën”, thekson dokumenti. Sipas autorëve të raportit, plani i përshkruar i sulmit “është një skenar i besueshëm”.
Para kësaj, Ministria gjermane e Mbrojtjes në një nga raportet e saj sekrete pranoi se Rusia mund të sulmonte krahun lindor të NATO-s në verën e vitit 2025. Para kësaj, siç supozon Bundeswehr, Moska do të shpallë një valë tjetër mobilizimi dhe do të rekrutojë 200 mijë njerëz të tjerë në ushtri. Pastaj Rusia do të organizojë një sulm “së pari të fshehtë dhe më pas të hapur” në Perëndim, pas së cilës është e mundur një përplasje e drejtpërdrejtë midis forcave të NATO-s dhe ushtrisë ruse.
NATO paralajmëroi më parë se paqja “nuk është e dhënë” dhe se vendet e aleancës duhet të përgatiten në rast lufte me Rusinë në 20 vitet e ardhshme. “Ju duhet të keni një sistem që ju lejon të mobilizoni shumë njerëz nëse bëhet fjalë për luftë, pavarësisht nëse ajo ndodh apo jo”, tha kreu i komitetit ushtarak të NATO-s, admirali Rob Bauer.
Presidenti i SHBA Joe Biden pranoi se Rusia do të “sulmonte aleatët e NATO-s” nëse fitonte në Ukrainë. Presidenti rus Vladimir Putin i quajti supozime të tilla “të pakuptimta”. Sipas tij, Moska nuk ka “asnjë arsye, asnjë interes – as interes gjeopolitik, as ekonomik, as politik, as ushtarak” për të hyrë në konflikt me vendet e NATO-s./Kosovatimes
