Banka Qendrore e Kosovës në kuadër në kuadër të planit për zbatim të lehtësuar të Rregullores për Operacione me Para të Gatshme, ka bërë thirrje ndaj të gjithë qytetarëve për përdorim të euros.
“Pranoni para përmes llogarisë bankare në euro. Kurseni dhe këmbeni në cilëndo valutë”, thuhet në mesazhet telefonike të dërguara nga BQK-ja për qytetarët.
Tutje BQK ka bërë thirrje për hapje të llogarive bankare me shërbime bazike, pa tarifa të hapjes dhe mirëmbajtjes.
Ky institucion kishte publikuar muajin e kaluar planin me veprime shtesë, të cilat pritet të realizohen në një afat prej më pak se tre muajsh, si lehtësim për qytetarët serbë pas ndalimit të qarkullimit të dinarit në vend.
Vendosja e bankomatëve dhe pajisjeve për pagesa elektronike, lehtësimi i procesit të këmbimit të dinarëve në euro, rritja e qasjes në financa, rishikimi i kushteve të konvertimit me trajtim preferencial gjatë pranimit të fondeve dhe tërheqjes në bankomate me kartela të skemave ndërkombëtare të lëshuara jashtë Kosovës janë disa nga pikat e planit me veprime shtesë. /Kosovatimes/
