Me 3 mars, Federata e pingpongut e Kosovës në bashkëpunim me klubet e pingpongut nga Skenderaj dhe Komuna e Skenderajt në Palestrën e Sportit Ilaz Kodra në Skenderaj organizuan edicionin e 23 të turneut memorial “ADEM JASHARI”.
Para fillimit të aktivitetit një delegacion i FPPK bëri homazh te kompleksi memorial Adem Jashari.
Aktiviteti filloj nga ora 10:00 me një fjalë rasti nga kryetari i federatës z. Nehat Çitaku dhe nga kryetari i Komunës së Skenderajt z. Fadil Nura, i cili shprehi mirënjohje ndaj kryetarit Nehati Çitaku për kthimin e organizimit të këtij aktiviteti në Skenderaj.
Turneu kishte pjesëmarrje masovike nga lojtarët nga Kosova e Shqipëria. Në turne morën pjesë rreth 150 pingpongistë meshkuj dhe femra. Garat u zhvilluan, së pari nëpër grupe (26 grupe tek meshkujt e 4 tek femrat), e më i miri i grupit tek meshkujt, e dy të parat nga femrat ju bashkuan elitës në skeletin kryesor për të vazhduar garat me sistem eliminimi.
Pas shumë ndeshjeve interesante si tek meshkujt ashtu edhe tek femrat, më të mirët vazhduan në ndeshjet gjysmëfinale.
Në konkurrencën e femrave në gjysmëfinalen e parë, Shega Hashani fitoj me 3:1 ndaj Taibe Rulit, ndërsa në gjysmëfinalen e dytë Leoresa Imeri fitoi ndaj Jona Hashanit me 3:0.
Finalja ishte shumë e barabartë, madje Leoresa pati dy meç poen në setin e 4-të, si dhe avancoj 8 me 4 në setin e pestë, por Shaga ja arriti të kthej rezultatin dhe të fitoj setin e pestë me 11:8 e kështu të shpallet fituese e këtij turneu.
Në kategorinë e meshkujve kishte po ashtu shumë ndeshje interesante, e në gjysmëfinalen e parë u takuan Kreshnik Mahmuti dhe Rrahmon Ademaj, të cilën me rezultat 3:1 e fitoi Kreshniku. Në gjysmëfinalen e dytë Fatih Karabashaku fitoi me 3:0 ndaj Milot Makollit.
Finalja ishe shumë interesante, e me shumë kthime të rezultatit, sa avanconte njëri e barazonte tjetri. Në setin e pestë Fatihu ishte duke udhëhequr me 5:2, por Kreshniku ktheu rezultatin duke fituar setin e pestë me 11:7 e kështu u shpall fitues i turneut. /Kosovatimes/
