Ministri i FSK-së, Ejup Maqedonci, hapjen e bazës ajrore ushtarake në Kuçovë të Republikës së Shqipërisë, e quajti një ngjarje historike që do t’i jap karakter tjetër gjeostrategjik Shqipërisë e Ballkanit në përgjithësi.
“Kjo bazë që do të shërbej si bazë ajrore taktike e operacionale përbën investimin më madhor të Shqipërisë dhe aleancës së NATO-s, si aset i vyer i mbrojtjes kolektive në dekadën më të kërcënuar të sigurisë”, tha ministri Maqedonci.
Forca e Sigurisë së Kosovës në përputhje me Planin Gjithëpërfshirës të Tranzicionit sipas tij do të ngrisë dhe kapacitetet e saj ajrore, urojmë që Shqipëria të vazhdojë ndërtimin e flotës moderme ajrore. Ai tha se si çdoherë kombi shqiptar është në anën e duhur të historisë, andaj dhe kjo bazë ashtu si dhe të gjitha kapacitetet ushtarake do të jenë vetëm në funksion të paqes.
“Përmes bazës ajrore të Kuçovës, situata e sigurisë në Ballkan tashmë do të shihet nga një prizëm tjetër, sigurisht më i konsoliduar se kurrë bashkëpunimi ndërmjet shteteve anëtare të NATO-s dhe fqinjëve tanë që duan stabilitetin”, tha ai. /Kosovatimes/
