Shtetasit ukrainas Dmtro Boyko (42) dhe Oleksandar Zaitsev (61) u dënuan në Bosnje dhe Hercegovinë me nga gjashtë vjet e 10 muaj burg secili për vjedhjen e rreth 1.3 milion euro nga 24 ATM të ish-Sberbank BiH, njoftuan mediat e Sarajevës.
Kolegji i Apelit i Gjykatës Supreme të Federatës së Bosnjës dhe Hercegovinës i dënoi të akuzuarit për krim të organizuar, në lidhje me veprën penale të mashtrimit kompjuterik, njoftuan nga ajo gjykatë.
Në shkurt të vitit 2020, Bojko dhe Zaajsev u arrestuan në Bihaq pasi bënë një tërheqje të paautorizuar të rreth 100,000 markave të konvertueshme, ose rreth 50,000 euro, nga një bankomat i Sberbank.
Gjatë vitit 2020, së bashku me pesë qytetarë të tjerë të Ukrainës, ata përdorën mjete dhe programe të ndryshme të sofistikuara kompjuterike dhe aksesuan bankomatet e Sberbank ruse në 24 lokacione.
Në ato operacione, me mashtrim kanë marrë shuma më të mëdha parash dhe përfitimi pasuror është gjithsej rreth 1.3 milionë euro. Aktgjykimi i shqiptuar është i formës së prerë dhe në dënimin e tyre do t’u llogaritet koha e qëndrimit në paraburgim pas arrestimit në vitin 2020.
