Një ngjarje e rëndë ka ndodhur sot në afërsi të Prizrenit ku një 70-vjeçar ka humbur jetën në një aksident. Siç raportojnë nga policia, aksidenti ka ndodhur në rrugën Prizren-Reçan.
Shoferi dyshohet se ka humbur kontrollin e automjetit duke rënë nga 10 metra lartësi. Bashkë me të ka qenë edhe bashkëshortja e të ndjerit e cila ka pësuar lëndime.
Lajmin për RTKlive e ka konfirmuar zëdhënësi i policisë për rajonin e Prizrenit, Shaqir Bytyqi.
“Me datë 06.03.2024 rreth orës 15:40 është raportuar për një vetëaksident trafiku në rrugën Prizren-Reqan me pasoja fatale. Deri te aksidenti ka ardhur kur ngasësi (F.M. I lindur me 1954 , mashkull) nga fshati Llokvicë, Prizren, derisa ishte duke drejtuar automjetin humbë kontrollin e automjetit dhe kalon në anën e majtë të rrugës, e godet anësoren dhe bie poshtë në lugun e lumit. Automjeti bie nga lartësi përafërsisht 10 metra.
Si pasojë e aksidentit ngasësi mbetet i vdekur në vend , ndërsa pasagjerja (E.M. e lindur më 1957) pëson lëndime trupore.
Ajo është dërguar në emergjencën e Spitalit Rajonal në Prizren dhe pas tretmanit mjekësor është liruar. Në konsultim me prokurorin kujdestar trupi i pa jetë është dërguar në Institutin e Mjekësisë Ligjore në Prishtinë”, ka deklaruar Bytyqi.
Rastin është duke e hetuar Njësia Rajonale e Trafikut Rrugor të Prizrenit.
