Dhoma e Tregtisë dhe Industrisë e Kosovës dhe Komuna e Pejës nënshkruan Memorandum Bashkëpunimi përmes së cilit palët pajtohen që të krijojnë partneritet me qëllim të shkëmbimit dhe ofrimit të këshillave profesionale për bizneset në fusha të ndryshme, si dhe të asistimit, promovimit e përkrahjes së komunitetit të biznesit.
“Ofrimi i këshillave profesionale në fusha të ndryshme për bizneset anëtare të DHTIK, këmbimi i informacioneve nga bazat e veta të të dhënave lidhur me aktivitetet e tyre dhe të bizneseve anëtarësi dhe përgatitja e propozimeve dhe realizimi i projekteve të përbashkëta që kanë të bëjnë me përkrahjen e komunitetit të biznesit kosovar, janë disa prej pikave që përmban Memorandumi i Bashkëpunimit ndërmjet Dhomës së Tregtisë dhe Industrisë me Komunën e Pejës”, thuhet në komunikatën e DHTIK.
Kryetari i Dhomës së Tregtisë dhe Industrisë Kosovë, Skënder Krasniqi, theksoi që ky është vetëm formalizim i bashkëpunimit afatgjatë me kryetarin dhe me Komunën e Pejës, sepse deri më tani me shumë sukses ju kemi asistuar bizneseve në tejkalim të sfidave të tyre.
Në anën tjetër, i pari i Komunës së Pejës, Gazmend Muhaxheri, shprehu gatishmërinë për të bashkëpunuar në zgjidhje të problemeve si dhe në projekte të përbashkëta, për të cilat Komuna e Pejës ka qenë dhe është në dispozicion deri më tani.
Në kuadër të bashkëpunimit ndërmjet Dhomës së Tregtisë dhe Komunës së Pejës u realizuan disa takime, në mesin e të cilave edhe “Kafja e Mëngjesit” ku bizneset e Komunës së Pejës diskutuan për sfidat që ato po hasin gjatë ushtrimit të veprimtarisë në këtë komunë. /Kosovatimes/
