Kryeministri i vendit, Albin Kurti, i ka uruar të gjithë mësimdhënësit për nder të 7 Marsit. Ai ka vizituar mësuesen e tij të parë Nafije Dobruna Deva.
Kurti, në një postim në Facebook, tha se në mëngjesin e sotëm isht për vizitë te familja Dobruna në Gjakovë, në shtëpinë në të cilën është lindur mësuesja e tij e parë Nafije Dobruna Deva.
“Evokuam kujtime të shumta e të paharrueshme me vajzën e mësueses, Afërditën, në këtë shtëpi të vjetër më shumë se dy shekuj, e ku tani banon kolegu im nga qeveria, Agon Dobruna, zëvendësministër i Financave, Punës dhe Transfereve. Mësuesja Nafije ishte kombinimi i përsosur i disiplinës dhe dashurisë: sado nxënës i mirë të kesh qenë, asnjë pesëshe nuk ka qenë e kollajshme. Ajo ka dhënë një kontribut të pamatshëm për arsimimin, edukimin e formimin tim, krahasueshëm me nënën time”, thotë Kurti .
Kurti shkruan se jeta e saj ka qenë e vështirë. “Babai, Ismaili, i internuar për dy vjet në burg në Vjenë si NDSh-ist gjatë Luftës së Dytë Botërore, pas së cilës bie në varfëri meqë pushteti i atëhershëm ia rrëmben pasurinë. Ai vdes pak vjet më pas. Nëna, Qazimja i rrit pesë fëmijë jetim. Më e madhja, Nafija, e mbaron Shkollën Normale dhe bëhet mësuese”, tha Kurti.
Ai tha se përveçse një buqetë me lule, Afërditës i ka dhuruar fotografinë e klasës I/4 me mësuesen Nafije, nga qershori i vitit 1982. Mandej nga klasa e dytë fotografitë zënë e bëhen me ngjyra.
“Falënderoj familjen Dobruna për mikpritjen e përzemërt në Ditën e Mësueses. Urime të gjithë mësimdhënësve 7 Marsi!”, shkruan Kurti në Facebook.
