Të paktën 8,565 njerëz vdiqën përgjatë rrugëve të migrimit nëpër botë në vitin 2023, duke shënuar vitin më vdekjeprurës që nga fillimi i regjistrimeve një dekadë më parë. Kështu njoftoi të mërkurën Organizata Ndërkombëtare për Migracionin (IOM) e OKB-së.
Numri i vdekjeve në 2023 është 20 për qind më i lartë se në 2022.
Në një deklaratë, Organizata Ndërkombëtare për Migracionin theksoi se këto të dhëna “tregojnë nevojën për veprime urgjente për të parandaluar humbjen e jetëve”.
Qindra mijëra njerëz përpiqen të migrojnë përgjatë rrugëve të paligjshme në kushte të pasigurta çdo vit, vëren IOM. Rrugët e sigurta dhe të rregullta të migrimit nuk janë të disponueshme për të gjithë.
Rrugët më të rrezikshme për emigrantët janë përmes Mesdheut, me të paktën 3,129 vdekje dhe zhdukje të raportuara atje vitin e kaluar.
Projekti i IOM-it për Emigrantët e Zhdukur u zhvillua në vitin 2014 si një bazë të dhënash e aksesueshme nga publiku për vdekjet dhe zhdukjet e migrantëve. Që atëherë, projekti ka dokumentuar më shumë se 63,000 raste në mbarë botën. Numri aktual vlerësohet të jetë shumë më i lartë sepse vështirësitë në mbledhjen e të dhënave, veçanërisht në rajone të largëta, kufizojnë aftësinë për të llogaritur me saktësi humbjet njerëzore. Kjo është raportuar nga Zëri i Amerikës duke iu referuar AFP.
