Presidenti ukrainas Volodymyr Zelensky vjen nesër në Stamboll ku do të pritet nga homologu i tij turk Rexhep Tajip Erdogan, njoftoi Presidenca dhe Ministria e Punëve të Jashtme turke mbrëmjen e sotme.
“Situata midis Ukrainës dhe Rusisë dhe kontaktet e fundit në lidhje me rifillimin e korridorit të sigurt në Detin e Zi” do të jenë në fokus të takimit, sipas një njoftimi për shtyp nga Presidenca e publikuar në rrjetin X.
Ministria e Punëve të Jashtme në një deklaratë të veçantë saktësoi se takimi do të mbahet në Pallatin Dolmabahçe në Stamboll, ku Erdogan tashmë priti Zelensky në korrik 2023.
Presidenti ukrainas vizitoi Turqinë në fillim të korrikut 2023 dhe ishte vizita e tij e parë në vend që nga fillimi i pushtimit rus në shkurt 2022. Më pas ai pati një bisedë të gjatë me presidentin turk, i cili mban lidhje të ngushta si me Kievin ashtu edhe me Moskën./Kosovatimes/
