Kryetari i Bashkimit të Sindikatave të Pavarura të Kosovës, Atdhe Hykolli, përmes një deklarate me shkrim ka uruar të gjitha gratë si dhe anëtaret e BSPK-së për Ditën Ndërkombëtare të Gruas.
“Ju shpreh përshëndetjet e mia më të ngrohta të gjitha grave të jashtëzakonshme brenda organizatës sonë po edhe të gjitha grave edhe më gjerë. Sot është një moment për të njohur dhe pranuar përparimin që kemi bërë në mbrojtjen e të drejtave të grave, por është gjithashtu një thirrje për veprim për të vazhduar shtytjen për barazi, fuqizim dhe drejtësi që vendi ynë ka shumë nevojë”, ka theksuar Hykolli.
Ai ka thënë se qëndrojnë të bashkuar në angazhimin sindikal për të krijuar një mjedis ku çdo grua mund të lulëzojë dhe të arrijë potencialin e saj të plotë.
“Ndërsa reflektojmë për të kaluarën, le të riafirmojmë përkushtimin tonë për të formuar një të ardhme ku gratë nuk janë vetëm pjesëmarrëse të barabarta, por janë edhe lidere në çdo aspekt të rrugëtimit tonë të përbashkët drejt zhvillimit të qëndrueshëm të shoqërisë sonë dhe të vendit tonë”, ka shtuar tutje ai.
Hykolli ka thënë se Bashkimi i Sindikatave të Pavarura të Kosovës mbetet i palëkundur në angazhimin e vet për të promovuar barazinë gjinore, për të mbrojtur paga të drejta dhe për të krijuar mundësi për gratë që të shkëlqejnë në karrierën e tyre.
