Bandat në Haiti kryen sulme të armatosura në shkallë të gjerë gjatë natës në disa ndërtesa qeveritare, përfshirë pallatin presidencial në Port-au-Prince, thanë burimet e sigurisë.
Kryeqyteti i Haitit është mbërthyer prej ditësh nga një valë sulmesh bandash të mirëkoordinuara ndaj organeve të zbatimit të ligjit dhe institucioneve shtetërore, që synojnë rrëzimin e qeverisë së kryeministrit Ariel Henry.
Një burim i tha ABC News se sulmi i mbrëmjes së sotme ishte i koordinuar dhe i shpejtë, me grupe të ndryshme që sulmuan njëkohësisht ndërtesa të shumta qeveritare, duke përfshirë pallatin presidencial, Ministrinë e Brendshme dhe selinë e policisë për distriktin perëndimor të Haitit, i cili përfshin Port-au-Prince.
Siç shtohet, janë dëgjuar edhe shpërthime, ndërsa qindra persona janë larguar nga zona gjatë konfliktit mes bandave dhe policisë.
“Ne jemi ende duke u përpjekur ta marrim situatën nën kontroll”, tha një burim sigurie për CNN.
Gjendja e jashtëzakonshme u shpall në Haiti javën e kaluar për shkak të përshkallëzimit të dhunës, bandat e armatosura sulmuan një burg dhe liruan të burgosurit dhe 10,000 njerëz u zhvendosën.
