Jo të gjithë pensionistët kanë gëzuar 100 eurot e premtuara nga Qeveria e Kosovës. Sipas një burimi janë mbi 1.000 persona që kanë kërkuar, por që ato mjete të dedikuara atyre janë zhdukur. Mos shpërndarja e atyre mjeteve është bërë për shkak të mos shpërndarjes së mbi 1.000 pensioneve pasi atyre u ka skaduar afati i paraqitjes së tyre që janë në jetë. Pensionistët janë të obliguar që çdo gjashtë muaj të paraqitet në sportelet gjegjëse për të dëshmuar se është gjallë. Paraqitja e pensionistëve nëpër sportele të zyrave të pensioneve ndodh edhe për shkak të mungesës së një sistemi të integruar të të dhënave përmes të cilit evidentohen rastet e vdekjes së pensionistëve në mënyrë që të ndalet pagesa e pensionit.
Më herët ishte vënë në funksion programi Ekosova për paraqitjen e atyre mbi 80 vjeç në mënyrë elektronike. Por kjo pavarësisht investimit asnjëherë nuk është realizuar. Madje në javën e parë të këtij projekti ka pasur rast që pensionisti u paraqit duke menduar se çdo gjë ka përfunduar. Mirëpo ai po atë muaj nuk ka marrë pensionin me arsyetimin banal se është dashur të paraqitet në zyrat e pensionistëve.
Avokatit të Popullit në Kosovë vite më parë ka qenë kritik për këtë formë të paraqitjes pasi siç theksonte një mënyrë e tillë shkel dinjitetin e njeriut.
Në dhjetor të vitit të kaluar Qeveria ndan nga 100 euro për fëmijët dhe pensionistët, përveç pensionit të rregullt. “Për të gjithë pension marrësit këtë fund vit, me qëllim të lehtësimit të kostos së jetesës për këtë kategori të cenueshme, do të miratojmë shtesën e njëhershme prej 100 eurove, përveç pensionit të rregullt mujor që marrin”, kishte thënë asokohe kryeministri Kurti. Megjithatë mbi 1.000 pensionistë nuk i kanë marrë këto mjete ndërsa arsyetimi në zyrën e pensionisteve ishte për shkak të mos paraqitjes me kohë!/Kosovatimes/
