Kryetari i Dhomës së Përfaqësuesve të SHBA, Mike Johnson dhe përfaqësues të një sërë komitetesh po hartojnë projektligjin e tyre për të ndihmuar Ukrainën. Këtë e raporton NBC News , duke cituar burime.
Autorët e projektligjit shpresojnë se propozimi mund të kalojë Kongresin “pa i larguar konservatorët që kundërshtojnë financimin e mëtejshëm” të Ukrainës. Burimet e NBC thanë se plani është në një fazë paraprake dhe është larg zbatimit të plotë.
Propozohet që një pjesë e ndihmës joushtarake të konsiderohet si hua. Asetet ruse të konfiskuara si rezultat i sanksioneve mund të përdoren si kolateral gjatë dhënies së kredive për Ukrainën. Plani mund të përfshijë gjithashtu një “sistem shlyerjeje bujare” për borxhin.
Sipas NBC, ky propozim synon të lehtësojë shqetësimet e konservatorëve në Dhomën e Përfaqësuesve të SHBA-së, të cilët kritikuan ndarjen e ndihmës miliarda dollarëshe për Ukrainën dhe nuk janë të gatshëm të mbështesin ndarjen e mëtejshme të ndihmës pa një plan afatgjatë për fitoren e Ukrainës.
Kryetari i Komitetit të Punëve të Jashtme të Dhomës së Përfaqësuesve, Michael McCaul tha se propozimi do ta bënte Rusinë të paktën pjesërisht përgjegjëse për të paguar për rindërtimin e Ukrainës.
Një projekt-ligj për ndarjen e fondeve për Ukrainën është diskutuar në Kongresin e SHBA që nga tetori 2023.
