Të paktën tre persona kanë mbetur të plagosur nga arma e zjarrit në orët e para të së dielës në Gjakovë.
Policia ka bërë të ditur se të plagosurit janë dërguar për trajtim mjekësor dhe gjendja e tyre është stabile.
Sipas policisë, të shtënat me armë zjarri kanë ndodhur brenda një lokali rreth orës 00:10.
“Sot rreth orës 00:10 kemi pranuar informatë për të shtëna me armë zjarri në një lokal në rrugën ‘Fan Stilian Noli’ në Gjakovë, ku për pasojë tre persona kanë marrë plagë, të cilat dyshohet të jenë shkaktuar nga armë zjarri. Policia menjëherë ju ka përgjigjur rastit dhe viktimave ju është ofruar trajtim mjekësor, nga informatat e para të pranuara, gjendja e tyre shëndetësore është stabile”, njofton zëdhënësi i Policisë, Sheremet Elezaj.
Për rastin janë duke kryer procedurat e nevojshme hetimore për zbardhjen e tij dhe kapjen e të dyshuarit.
Elezaj ka thënë se në konsultim me prokurorin e shtetit është iniciuar rast “vrasje në tentativë” dhe “mbajtje në pronësi , kontroll ose posedim të paautorizuar të armëve”.
