Tokat bujqësore pavarësisht se punohen apo jo, do të tatohen. Ky vendim i marrë nga Ministria e Financave, do t’i ngarkojë bujqit financiarisht. Ndërsa ky vendim nuk i obligon 4 komunat veriore të Republikës së Kosovës që të paguajnë tatim për këto toka.
Vendimi i Ministrisë së Financave për tatim të tokave bujqësore, nuk i ka pëlqyer aspak bujqve të Kosovës. Kjo për faktin se atyre do t’u rritet kostoja për ta punuar tokën. Valon Vehapi, kultivues i grurit, i tha Radio Kosovës se nga ky vendim, automatikisht do t’i rritet qiraja e tokave që ai i ka marrë për kultivim të grurit.
“Do të ishte shumë më e logjikshme, më e kapshme sikur të ishin tatimuar tokat bujqësore të cilat janë të pa punueshme, e që janë pjesë e madhe. Këtë barrë do ta bartin bujqit të cilët e punojnë tokën. Unë si bujk komercial që jam, e që i marrë mbi 100 hektarë tokë me qira, mua automatikisht do të më ngritët qiraja e tokës, nëse e kam pasur 100 euro hektarin, tash do të rritet edhe për këtë diferencën sa e ka vendos tatimin në pronë. Kjo është ajo që do të na kushtojë neve bujqve që jemi prodhues të drithërave në vendin tonë”, tha Vehapi.
Sazan Ibrahimi, drejtor Ekzekutiv i Asociacionit të Komunave të Kosovës, tha se ky vendim nga Ministria e Financave është marrë pa i konsultuar komunat. Ai tha se kjo do t’u sjellë ngarkesa bujqve tanë.
“Nga kjo po shihet se do të ketë ngarkesë financiare edhe për bujqit. Qëllimi kur është hartuar ligji i kaluar, ku ka pasur konsulta edhe me publikun, ka qenë që bujqit të cilët punojnë tokat të mos tatohen, por të nxiten ata që nuk punojnë toka, t’i punojnë ato. Mirëpo Ministria e Financave, në gusht të vitit të kaluar pa konsulta e ka marrë vendimin që të gjitha tokat të tatohen. Pasi ne nuk kemi qenë të involvuar fare gjatë hartimit të Ligjit për Pronën e Paluajtshme, atëherë bujqit ndoshta do ta ngrehin zërin për këtë punë”, tha ai.
Ibrahimi shtoi se ndryshe nga komunat e tjera, katër komunat veriore nuk janë të obliguara sipas këtij vendimi, të paguajnë tatim për prona bujqësore. Ai tha se kjo është e papranueshme.
“Është për çudi se si ligjet në Republikën e Kosovës mund të zbatohet në mënyre parciale për disa komuna e për disa jo. Për këtë vit nuk është paraparë që në veri të paguhet tatimi në tokat bujqësore”, tha Ibrahimi.
Në gusht të vitit 2023, Ligji për Tatimin në Pronën e Paluajtshme është ndryshuar dhe plotësuar, me ç’rast pronat bujqësore, përkatësisht parcelat (tokat) bujqësore në të gjithë territorin e Republikës së Kosovës, tatohen, pavarësisht faktit se janë apo jo njësi parcele bujqësore të kultivuara. Përjashtimisht, tatimi në pronë për asnjërën nga kategoritë e pronave nuk zbatohet në katër komunat veriore të Kosovës për arsye politike.
