Kombëtarja e Kosovës U 16 në konkurrencën e vajzave ka pësuar humbje në ndeshjen e dytë në kuadër të turneut zhvillimor të UEFA-s në Tiranë.
Pas fitores bindëse ndaj Shqipërisë në ndeshjen e parë (6:0), Dardanet e reja kanë pësuar humbje nga Portugalia, e cila konsiderohet shumë më e fortë dhe me kualitet, me rezultat 2:0.
Kosova e pa vetën në disavantazh në minutën e 12-të, kur portugezet shënuan golin e parë. Pavarësisht tentimit për të ndryshuar rezultatin, futbollistet e përzgjedhëses Albina Rrahmani nuk e patën një mundësi të tillë për t’ia arritur qëllimit në pjesën e parë.
Në vazhdim të lojës, kur Dardanet synonin të gjejnë rrugën e golit të barazimit, ishte sërish Portugalia e cila shënoi, kur po zhvillohej minuta e 59-të për rezultatin 2:0, që në fund doli të ishte epilogu i kësaj ndeshjeje.
Ndonëse edhe Kosova pati raste, Dardanet nuk arritën t’i konkretizojnë.
Përzgjedhësja e kësaj grupmoshe Albina Rrahmani pohoi se mungesa e fatit dhe e eksperiencës e penalizoi ekipin e Kosovës: “Portugalia është ekip me emër dhe me kualitet. Ne e dimë që futbolli i vajzave atje është shumë më i zhvilluar se sa tek ne. Megjithatë, vajzat tona nuk u treguan inferiore por iu qasën lojës shumë mirë dhe me shumë seriozitet. Luftuan shumë dhe për këtë jemi shumë të kënaqur si staf i trajnereve. Golat i morëm si mungesë përqendrimi. Edhe ne kishim rastet tona, por na mungoi pak fat por gjithashtu edhe eksperienca. E rëndësishme është që vajzat tona po rriten si futbolliste dhe po përmirësojnë lojën e tyre në çdo ndeshje, për çka shërben edhe ky turne. Mendoj se do ta kemi një gjeneratë të mirë që do të vazhdojë tek U17”, theksoi përzgjedhësja Rrahmani për faqen zyrtare të FFK-së.
Ndeshjen e radhës dhe të fundit në kuadër të këtij turneu, Kosova e zhvillon më 16 mars kundër Skocisë.
