Derisa të kalojnë problemet politike mes qeverisjes së kaluar në Gjilan dhe kësaj aktuale, futbollistët e tifozët e Gjilanit do të presin të nisin punimet për renovimin e stadiumit të Gjilanit.
Asnjë tifoz nuk shihet në stadiumin e qytetit në Gjilani, pasi për shkak të gjendjes së mjerueshme atje nuk po zhvillohen as ndeshje.
Punimet për renovimin e këtij stadiumi filluan në vitin 2017, por nuk përfunduan as pas 7 vitesh. Për renovimin e tij u ndanë 15 milionë euro nga Ministria e Kulturës dhe Sportit në shtator të vitit të kaluar.
Por pas hapjes së tenderit nga Komuna e Gjilanit, Zyra e Prokurimit mori vendim për pezullimin e këtij procesi.
Nga Komuna e Gjilanit thonë se punimet për renovimin e stadiumit pritet të fillojnë së shpejti.
|Kemi pasë ankesa nga disa operatorë, është shqyrtua lënda edhe nga OSHP-ja dhe na kanë rekomandua me i ndërrua disa kritere. Do të thotë nuk ka pasur asnjëherë anulim, ka pasur pezullim të procesit por ende ka kohë për të aplikua operatorët ekonomikë. Ne po besojmë se së shpejti do mbarojnë këto procedura, derisa të nënshkruhet kontrata dhe të fillojmë punën”, tha Kushtrim Zeqiri, drejtor i Drejtorisë për Kulturë, Rini dhe Sport në Gjilan.
Ai thotë së si qeverisje e re, këtë stadium e kanë gjetur në një fazë jo të mirë.
Në anën tjetër, ish-nënkrytari i Gjilanit nga radhët e LDK-së, Arbër Ismajli, thotë se punimet kanë ngecur pas pushteti i ri kishte vendosur ta shkëpusë kontratën me operatorin që ka qenë i kontraktuar.
“Na ka zënë ndërrimi i pushtetit, koha e pandemisë, dhe pushteti i ri që ka ardhë e ka vlerësua që është më mirë me u shkëput kontrata dhe me fillua procedurat e reja. Pikërisht shkëputja e kontratës e ka shkaktua këtë ngecje. Ne e kemi nis si proces, aty punimet kanë fillua, është krye një fazë goxha e vështirë në atë kohë, unë lutem që këta me fillua me punua, sepse interesi është nacional përfundimi i stadiumit, jo lokal”, tha Ismajli.
