Autoriteti i Konkurrencës i Republikës së Kosovës (AKRK), në bazë të Konkluzionit të Sekretariatit të AKRK-së, ka filluar procedurën hetimore sipas detyrës zyrtare (ex officio) ndaj ndërmarrjes “Elektra” me emër tregtar “Elektra” Telkos SH.P.K dhe “AE Holding” L.L.C., me emër tregtar Telkos.
Sipas njoftimit të AKRK-së, hetimet ndaj ndërmarrjes “Elektra” kanë filluar për shkak të dyshimit të arsyeshëm se e njëjta ka realizuar shitblerjen e aksioneve të ndërmarrjes “Fiberlink SH.P.K”, kurse ndërmarrja “AE Holding” ka realizuar shitblerjen e aksioneve “Kumanova Cable SH.P.K”, pa e paraqitur fare kërkesën për lejimin e përqendrimit në Autoritetin e Konkurrencës.
“Vendimi për fillimin e hetimeve ndaj këtyre ndërmarrjeve është marrë më datë 13.03.2024, në mbledhjen e Komisionit të Autoritetit të Konkurrencës të Republikës së Kosovës. AKRK, njofton se ka filluar monitorimin e tregut, duke u bazuar në shkrimet e botuara në mediat elektronike, rrjete sociale lidhur me dyshimet për transaksionet e realizuara, rrjedhimisht blerjes së aksioneve apo fitimit të kontrollit mbi ndërmarrjet tjera në tregun përkatës, për të cilat dyshohet se përmbushin detyrimin për paraqitje të Njoftimit të Përqendrimit”, thuhet në njoftimin e AKRK-së.
Tutje ky institucion ka thënë se në bazë të Ligjit për Mbrojtjen e Konkurrencës ndërmarrjet janë të obliguara që çdo realizim të përqendrimit të ndërmarrjeve, pjesëmarrësit e përqendrimit janë të detyruara ta njoftojnë autoritetin, kur të plotësohen kushtet e përcaktuara.
“Shprehimisht ndalohen përqendrimet që mund të shtrembërojnë ndjeshëm konkurrencën, veçanërisht nëse përqendrimi ka si pasojë krijimin ose forcimin e pozitës dominuese, që nënkupton se lëndët e caktuara duhet t’i nënshtrohen paraprakisht vlerësimit të Autoritetit të Konkurrencës. Autoriteti njofton se, fillimi i procedurës për hetimin e këtyre ndërmarrjeve, ka për qëllim sqarimin e fakteve dhe në këtë mënyrë vërtetimin e shkeljeve të pretenduara. AKRK do të marrë vendimin e saj meritor bazuar në faktet e vërtetuara të rastit dhe do të mbaj të informuar opinionin dhe qytetarët”, thuhet tutje në njoftimin e AKRK-së. /Kosovatimes/
