Një ditë pas publikimit të konkursit, kryeqyteti po i mendon disa opsione për ndërtimin e sheshit monumental “Adem Jashari“.
Në konkursin që është hapur të enjten, janë publikuar të gjitha kriteret që parashihen për konkurrentët që duan të aplikojnë në ndërtimin e një prej shesheve që i ka munguar kryeqytetit.
Opozita e ka mirëpritur shpalljen e konkursit.
Sheshi monumental “Adem Jashari” mund të vendoset pas sheshit “Ibrahim Rugova” e përballë parkingut të Parlamentit.
Ky është njëri nga opsionet të cilat i ka menduar komuna. Në një pjesë të rrugës “Agim Ramadani” ku pritet të nisë ndërtimi i një nënkalimi, deri vitin tjetër mund të ndërtohet edhe sheshi monumental për Komandantin Legjendar.
Konkursi për krijimin e tij është hapur të enjten.
Donat Lushaku, zëdhënës i komunës së Prishtinës, ka thënë se sheshi monumental “Adem Jashari” do të jetë mjaft i rëndësishëm për qytetin e Prishtinës.
“Një opsion është hapësira mes kuvendit dhe qeverisë, por që nuk ka lokacion final, pasi duhet koordinuar me familjen Jashari. Nuk do të jetë një nga ato shtatoret klasike, por do të përfaqësojë një dizajn monumental unik dhe mjaft të rëndësishëm për qytetin e Prishtinës, siç i dimë meqë është hapur dje, i njëjti do të qëndrojë i hapur për një muaj”, tha Lushaku.
Kostoja e ndërtimit të sheshit dhe data e mundshme e përurimit ende nuk dihen.
“Sa i përket kostos nuk ka diçka definitive, janë ndarë disa mjete buxhetore viteve të kaluara, pritet të jepen disa shpërblime për fituesit në këtë konkurs, edhe ato do të caktohen, ndërsa si datë tentative për përfundimin e këtij sheshi monumental, do të tentohet që të jetë 28 nëntori i këtij viti që është edhe ditëlindja e komandantit Adem Jashari në momentin më të vonshëm brenda 2025”, ka shtuar Lushaku.
“Edhe në të kaluarën ka pasur nisma të tilla, por nuk ka rezultuar që të vendoset shtatorja e Adem Jasharit në Prishtinë, kështu që ne e mirëpresim këtë nismë, mirëpo tash i presim edhe hapat tutje, shpresojmë se shtatorja të vendoset sa më shpejt”, ka thënë Besart Krasniqi, asamblist i VV-së.
