Oda Sllovene e Bizneseve në Kosovë njofton se Forumi ekonomik ndërmjet Kosovës dhe Sllovenisë do të mbahet më 22 mars, në Kranjska Gora, ku do të marrin pjesë mbi 80 biznese.
“Pas një pune të madhe nga të gjitha palët po ofrohet data e njërës nga ngjarjet më të rëndësishme: Forumi ekonomik ndërmjet Kosovës dhe Sllovenisë, më 22 mars, në Kranjska Gora, mbi 80 biznese do të jenë pjesë e këtij forumi, ku do të kenë mundësi edhe për takime B2B, si pikënisje për suksese të reja!”, thuhet në njoftimin e kësaj komunikate.
Bëhet e ditur se në forum do të marrë pjesë ministrja e Industrisë, Ndërmarrësisë dhe Tregtisë, znj. Rozeta Hajdari si dhe U.d. i drejtorit të KIESA-s, Zef Dedaj. Kurse nga qeveria sllovene do të marrë pjesë ministri i Ekonomisë, Turizmit dhe Sportit, Matjaž Han, si dhe drejtori i Agjencisë SPIRIT, Rok Capl.
Oda Sllovene e Bizneseve, si bashkorganizatore e këtij forumi, fton bizneset që të aplikojnë për pjesëmarrje në këtë forum. /Kosovatimes/
