Ministri i Bujqësisë, Faton Peci, ka bërë të ditur se janë rikthyer mbi 600 metra katrorë në shërbim të Ministrisë së Bujqësisë në një objekt në Ulpianë të Prishtinës.
Ministri Peci ka njoftuar se ka vizituar hapësirat e objektit të Ministrisë së Bujqësisë, në Lagjen Ulpiana në Prishtinë.
“Kemi rikthyer mbi 600 metra katror në shërbim të institucionit. Së shpejti do të fillojmë me procesin e renovimit. Mbetem optimist se instancat e sistemit të drejtësisë do të marrin një vendim meritor që objekti i Ministrisë dhe hapësirat përreth saj të jenë në shfrytëzim dhe shërbim për titullarin dhe, njëherit, të mundësohet zbatimi i vendimit tim si Ministër i marrë me datë 22.08.2023”, ka shkruar Peci në Facebook.
Kurse, Aleanca për Ardhmërinë e Kosovës i ka reaguar ministrit të Bujqësisë, Faton Pecit, i cili ka thënë se i janë rikthyer mbi 600 metra katrorë në shërbim të Ministrisë së BUjaqësië, ku është e vendosur AAK-ja.
Në reagimin e saj AAK-ja ka theksuar se ky subjekt politik ka kontratë me Ministrinë e Bujqësisë për një pjesë të objektit.
“Ne paguajmë qira mujore për shfrytëzimin e 569 metra katrorë, në katin përdhesë dhe të parë në vlerë prej 4552 eurosh në muaj, ku nuk përfshihet as bodrumi e as kati i dytë, që janë të mbyllura e të lëna në gjendje të mjerueshme. Pohimet e këtij far ministrit se gjoja “I rikthyem mbi 600 metra katrorë në shërbim të titullarit…”, janë pjesë e manipulimit ordiner të tij për të krijuar përshtypjen sikur ato paskan qenë të uzurpuara nga dikush”, thuhet në reagim.
Sipas AAK-së, nuk është hera e parë që Peci bënë manipulime të kësaj natyre me qëllim që ta luftojë politikisht Aleancën për Ardhmërinë e Kosovës, sepse edhe ashtu i kanë mbetur pak ditë aty ku është.
“Ne jemi përpjekur që të jemi të kujdesshëm e të mos hapim debat publik dhe marrëdhëniet kontraktuale t’i kryejmë siç bëjnë subjektet e përgjegjshme, e të pranojmë të paguajmë një qira që është mbi vlerën e tregut, për një objekt që e ka renovuar Aleanca me mjete të veta, por këtë herë nuk mund mos të themi se Faton Peci është një manipulues ordiner. Aleanca është në shtëpi të vet dhe aty do të qëndrojë pavarësisht a i pëlqen dikujt apo jo’ theksohet në reagim, duke publikuar fotot e hapësirës.
