Shefi i Zyrës së BE-së viziton veriun, adreson kritika për dinarin

Shefi i Zyrës së BE-së në Prishtinë, Tomas Szunyog, ka vizituar sot Mitrovicën e Veriut, ku ka takuar përfaqësues të Qendrës Klinike Spitalore dhe përfaqësues të shkollës “Sveti Sava”.

Siç thuhet në njoftimin e Zyrës së BE-së, gjatë kësaj vizite është diskutuar për sfidat me të cilat po përballen serbët në veri pas Rregullores së re të BQK-së për operacionet me para të gatshme, vendim ky të cilin BE e konsideron si vendim të pakoordinuar dhe që nuk iu komunikua popullatës atje.

“Ambasadori Szunyog tha se ky vendim së bashku me çështje të tjera të kahershme kanë prekur seriozisht popullatën serbe të Kosovës dhe komunitetet tjera në mbarë Kosovën dhe pengojnë ofrimin e shërbimeve bazë”, thuhet në njoftimin e Zyrës së BE-së.

Çështje të tilla duhet të adresohen urgjentisht në formatin e Dialogut në interes të popullit,” ka thënë ambasadori Szunyog.

Ambasadori i BE-së ka vizituar edhe nënstacionin e Vallaqit dhe selinë e Elektroseverit, e cila ka iniciuar faturimin e konsumit të energjisë elektrike në veri të Kosovës. Ai ka vënë në dukje se ky është një hap i rëndësishëm përpara në procesin e normalizimit.

“Ai është takuar edhe me përfaqësues të MTS d.o.o. për të diskutuar në sfidat aktuale operative dhe planet e ardhshme të zhvillimit. Siç tha ai: Mirë që takohem me përfaqësuesit e një kompanie që ofron shërbime telekomi për dhjetëra mijëra njerëz si rezultat i dialogut të lehtësuar nga BE-ja”, thuhet tutje në njoftim. /Kosovatimes/