Kryeminstri Albin Kurti në 20-vjetorin e mbytjes së tre fëmijëve në lumin Ibër që çuan në atë që njihen si “trazirat e marsit” ka vizituar varret e tyre, duke shkruar se paqja dhe siguria nuk mund të merren si të mirëqena.
“20 vjet pas, i kujtojmë ato ngjarje, ndonëse me shumë të panjohura se si rrodhën, teksa ia rikujtojmë vetes se paqja dhe siguria nuk mund të merren të mirëqena. Ato janë më të vështira se dhuna, sepse duhet të mbahen, ruhen e mirëmbahen vazhdimisht”, ka shkruar ai.
Kurti në mënyrë kronologjike ka folur për ngjarjen e cila vazhdoi me protestat anë e kënd vendit, vrasjen e dhjetëra qytetarëve në shumë qytete të Kosovës si Mitrovica, Lipjani, Gjilan, Dajkoc, Bellopojë e të tjera.
“Qindra persona u plagosën, përfshirë këtu pjesëtarë të policisë vendore dhe asaj ndërkombëtare, qindra prona private e objekte të ndryshme u shkatërruan ose dëmtuan përfshirë edhe dhjetëra objekte kulturore dhe fetare. Hakmarrja dhe reagimi për ngjarjet e marsit u përcoll edhe në anën tjetër të kufirit, në Serbi. Dhunë pati në qytetet e Nishit dhe Novi Sadit. Shënjestër ishin shqiptarët dhe grupet tjera të pakicave. Edhe atje u shkaktuan dëme në prona private dhe objekte fetare e kulturore”, ka shkruar Kurti.
Ai ka thënë se në atë kohë Kosova nuk kishte përgatitjen institucionale që ka tani për të parandaluar situatën, meqë ishte nën administrim total ndërkombëtar.
“Policia e Kosovës që atëherë quhej Shërbimi Policor i Kosovës, përbëhej nga trupa që nuk ishin të pajisur për trazira të tilla. E megjithatë, disa pjesëtarë të Policisë treguan guxim duke rrezikuar jetën e tyre për të ndihmuar e mbrojtur serbë në shumë qytete dhe fshatra. Prej atëherë shumica e dëmeve materiale që atë kohë kishin marrë përparësi para humbjeve njerëzore, u rikuperuan. Objektet e kultit fetar ortodoks u rinovuan me para të taksapaguesve të Kosovës. Atyre sot u ofrohet mbrojtje e fizike e veçantë nga Policia e Kosovës”, ka shkruar Kurti. /Kosovatimes/
