Shkruan: Florim ZEQA
Zbatimi i marrëveshjeve ndërkombëtare paraqet kushtin themeltar të Kosovës për ecje para dhe zhvillim ekonomik, për mirëqenie qytetare dhe anëtarësim në organizata ndërkombëtare.
Pa dyshim se vendimi i kryeministrit Albin Kurti për zbatimin e vendimit të Gjykatës Kushtetuese sa i përket pronarëve të Manastirit të Deçanit, ishte njëri ndër vendimet e vështira, por të domosdoshme dhe më pragmatike për të ardhmen e Kosovës.
Në hap me partnerët strategjik
Prolongimi i implementimit të marrëveshjeve ndërkombëtare vetëm sa e ndihmon Serbinë në invazionin e saj politik kundër Kosovës, kurse zgjidhja e të gjitha temave të hapura me Serbinë shkon në favorin e Kosovës.
Më mirë që ju dhanë në pronësi Manastirit te Decanit 24 hektarë tokë sesa t’i jepeshin rreth 800 hektarë qe i kishte në të kaluarën e largët.
Sa më parë që të themelohet Asociacioni i Komunave Serbe ashtu siç është nënshkruar në Bruksel, në përputhje me rekomandimet e Gjykatës Kushtetuese aq më mirë për ne, në të kundërtën, mund të na dali jashtë kontrollit të plotë ajo pjesë e e çmuar e vendit tonë.
Zbatimi në plotni i marrëveshjeve ndërkombëtare e forcon sovranitetin e shtetit në tërë territorin e vendit dhe ruan marrëdhëniet e shkëlqyera me partnerët strategjik të Kosovës, pa të cilët Kosova nuk mund të ekzistojë si shtet në hartën gjeopolitike të Evropës.
Për interesin e shtetit të hiqen vijat ndarëse pozitë-opozitë
Andaj, kur është në pyetje interesi ekzistencial i shtetit të Kosovës, nuk guxojmë të ndahemi në baza partiake dhe as ta luajmë “patriotin” dhe “tradhtarin”, por të gjithë duhet të bëhemi bashkë në mbrojtje të shtetit ashtu siç na rekomandojnë ShBA-të dhe shtetet më të fuqishme të Bashkimit Evropian.
Pra, nuk kemi nevojë t’i quajmë tradhtarë ata që nënshkruan marrëveshjet ndërkombëtare dhe as këta që ju erdhi koha t’i zbatojnë sot ato marrëveshje!
Rrethanat kohore dhe zhvillimet e gjithmbarshme politike na e diktojnë unifikimin e spektrit politik dhe mbarë faktorit shqiptar rreth çështjeve madhore.
Nuk e besojë që ka çështje më madhore për politik-bërjen kosovare sesa ruajtja e sovranitetit dhe integritetit territorial të vendit tonë, për të cilën gjë e kemi mbështetjen e ShBA-së dhe BE-së si dhe të gjitha shteteve njohëse të pavarësisë së shtetit tonë.
Duhet t’i marrim seriozisht thirrjet e miqve tonë, për hedhjen e hapave para drejt përmbylljes sa më të shpejtë të dialogut me Serbinë, sikurse që duhet t’i marrim seriozisht edhe shqetësimet e miqve tonë për rrezikun e rrëshqitjes dhe kthimit pas të Kosovës në vitin 1999!
Është fat i madh për ne, që në krye të shtetit e kemi presidenten Vjosa Osmani, garantuesen kryesore të marrëdhënieve dypalëshe ndërmjet ShBA-ve dhe Republikës së Kosovës. Kryeministrit Albin Kurti, i mbetet që pa asnjë hezitim t’i kryejë të gjitha obligimet ndërkombëtare që shkojnë në funksion të mbrojtjes dhe sigurisë së shtetit të Kosovës. Kosovës nuk i duhen hapa prapa, por hedhje të hapave para dhe guximshëm drejt integrimeve ndërkombëtare.
