Kryetari i Kuvendit të Kosovës, Glauk Konjufca, takoi kryetarët e komisioneve parlamentare, për të diskutuar për mbikëqyrjen e zbatimit të ligjeve.
Përmes një njoftimi për medie, bëhet e ditur se pjesë e këtij takimi ishin edhe përfaqësuesit e NDI-it, e cila së bashku me USAID-in e ka mbështetur Kuvendin në hartimin e doracakut për procesin e mbikëqyrjes së zbatimit të ligjeve nga Kuvendi i Republikës së Kosovës.
Kryetari Konjufca tha se, përveç miratimit të ligjeve, edhe mbikëqyrja e zbatimit të tyre është shumë e rëndësishme për shoqërinë dhe shtetin e Kosovës.
Tutje, në njoftim thuhet se kryetari i Kuvendit inkurajoi kryetarët e komisioneve parlamentare që të hartojnë edhe miratojnë projektligje sa më përmbajtësore, por njëkohësisht të fokusohen edhe në aktivitetet mbikëqyrëse të Kuvendit, duke kërkuar nga kryetarët e komisioneve parlamentare që raportet e mbikëqyrjes së zbatimit të ligjeve t’i publikojnë me kohë.
“Kreu i Kuvendit falënderoi USAID-in dhe NDI-në për mbështetjen e vazhdueshme, duke vlerësuar se doracaku për procesin e mbikëqyrjes së zbatimit të ligjeve do ta plotësojë boshllëkun sa i përket metodologjisë së procesit mbikëqyrës që ka ekzistuar në Kuvendin e Kosovës”, thuhet në njoftim.
Ndërkaq nga ana e tij, përfaqësuesi i NDI-së, Valon Kurhasani, tha se mbikëqyrja e zbatimit të ligjeve është sfidë jo vetëm për Kuvendin, por edhe për kuvendet e shteteve të tjera.
Kurhasani theksoi se gjatë hartimit të doracakut janë marrë praktikat e disa vendeve evropiane dhe se pas një periudhe kohore të pilotimi së bashku me Kuvendin do të vlerësohet nëse është e nevojshme që të plotësohet apo jo.
“Gjatë diskutimit, kryetarët e komisioneve parlamentare folën për përvojat dhe sfidat e procesit të mbikëqyrjes së zbatimit të ligjeve në Kosovë. Doracaku i hartuar me mbështetjen USAID-it dhe NDI-së, u vlerësua lartë edhe nga kryetarët e komisioneve parlamentare”, thuhet në njoftim, derisa bëhet e ditur se si konkluzion i përbashkët ishte që Kuvendi duhet të shtojë dinamikën e mbikëqyrjes së zbatimit të ligjeve në Kosovë. /Kosovatimes/
