Disa tregues financiarë, ekonomikë dhe ushtarakë sugjerojnë se Rusia po përgatitet për një “konflikt konvencional në shkallë të gjerë me NATO-n”, sipas një ekipi ekspertësh në organizatën amerikane të mendimit.
Instituti Amerikan për Studimin e Luftës (ISW) pretendon se një konflikt i tillë mund të ndodhë në një afat të shkurtër – “jo menjëherë, por ndoshta në një kornizë kohore më të shkurtër se sa supozuan fillimisht disa analistë perëndimorë”, raporton SkyNews .
Organizata i referohet gjithashtu komenteve të djeshme të presidentit polak Andrzej Duda, i cili sugjeroi se Rusia po kalon në një ekonomi lufte “me synimin për të qenë në gjendje të sulmojë NATO-n që në vitin 2026 ose 2027”.
Gjithashtu u vunë në dukje fjalët e ministrit danez të Mbrojtjes Troels Lund Poulsen më 9 shkurt se “inteligjenca e re tregon se Rusia mund të tentojë të sulmojë një vend të NATO-s brenda tre deri në pesë vjet”.
Ristrukturimi i ushtrisë dhe ndryshimet në legjislacion, të cilat tashmë janë raportuar nga mediat e huaja, i hapin rrugën suksesit afatshkurtër në Ukrainë dhe e përgatisin Rusinë për një konflikt të ardhshëm me NATO-n, paralajmëroi ISW.
“Ndryshimet e vazhdueshme të personelit brenda Ministrisë ruse të Mbrojtjes mund të jenë tregues të mëtejshëm të përgatitjeve të Rusisë për një konflikt afatgjatë”, shtoi ai.
Udhëheqja e re do të trajtojë “çështjet logjistike për të mbështetur reformat e vazhdueshme ushtarake konvencionale, duke vendosur terrenin për përpjekjet afatgjata për të ndërtuar aftësitë konvencionale të Rusisë”, thuhet në analizë./Kosovatimes/
