Kombëtarja shqiptare nesër mbrëma luan miqësoren me Kilin, ndeshje kjo që luhet në Parma të Italisë.
Kuqezinjtë pas ndeshjes me Kilin, miqësoren e radhës do të luajë në udhëtim te Suedia, sfidë kjo që luhet më 25 mars në stadiumin “Friends Arena” të Stokholmit.
“Federata Shqiptare e Futbollit njofton të gjithë tifozët shqiptarë që janë të interesuar të ndjekin ndeshjen miqësore Suedi – Shqipëri, se mund të vazhdojnë të blejnë bileta edhe në sektorët 120-121. Për shkak të interesit të jashtëzakonshëm, biletat për katër tribunat e vëna në dispozicion për tifozerinë shqiptare, janë shitur të gjitha”, thuhet në njoftimin e FSHF-së.
FSHF sipas këtij njoftimi, ka rënë dakord me Federatën Suedeze të Futbollit që të hapen dy sektorë të tjerë për të gjithë tifozët e interesuar për të ndjekur miqësoren Suedi – Shqipëri që do të luhet më 25 mars në stadiumin “Friends Arena” të Stokholmit duke nisur nga ora 19:00.
FSHF bën me dije se biletat e vlefshme për këtë ndeshje do të shiten online në këtë link: Bli bileta për ndeshjen Suedi – Shqipëri
Procedura se si mund të blini biletë online:
Klikoni në linkun Bli bileta për ndeshjen Suedi – Shqipëri dhe më pas klikoni në hapësirën “BUY TICKETS”
Në momentin qe klikoni do t‘ju shfaqen sektorët dhe vendet ku ju mund të zgjidhni biletën tuaj.
Përzgjidhni mënyrën e dërgesës së biletës: Përmes e-mailit apo aplikacionit AXS.
Hapni një llogari në axs.com ose në aplikacionin AXS TICKETS.
Metoda e pagesës: Përzgjidhni metodën e pagesës duke zgjedhur ”PAY BY CARD” ku mund të përdorni: American Express, MASTER CARD ose VISA.
Pasi të keni marrë biletën, nuk është i nevojshem printimi i biletës, pasi ajo është elektronike.
