Kryeministri i vendit, Albin Kurti, ka kujtuar vrasjen e Agim Hajrizit, profesorit universitar, Latif Berisha, si dhe avokati të njohur, Bajram Kelmendi, të cilët, teksa aeroplanët e NATO-s nga qielli filluan bombardimin e caqeve të forcave serbe, si përgjigje ndaj krimeve të Serbisë së Millosheviqit në Kosovë, kriminelët serbë vranë këta tre veprimtarë të njohur shqiptarë.
Ai, përmes rrjetit social ‘Facebook’ bën të ditur se kriminelët serbë vranë në Mitrovicë kryesindikalistin Agim Hajrizi dhe politikanin Latif Berisha, ndërsa në Prishtinë vranë avokatin Bajram Kelmendi.
“Agim Hajrizi, sindikalistit të paepur, kryetar i Kuvendit të Bashkimit të Sindikatave të Pavarura të Kosovës, si dhe kryetar i organizimit komunal në Mitrovicë në vitet e ’90-ta, u vra në shtëpinë e tij, bashkë me nënën Nazmije dhe të birin 11 vjeçar, Ilirin. Latif Berisha, politikan e intelektual, kryetar i LDK-së në Mitrovicë, profesor universitar i historisë së letërsisë shqipe e autor i shumë studimeve, udhëheqës i pajtimit të gjaqeve, u vra nga forcat serbe në prag të shtëpisë së tij në Mitrovicë, në natën e 24 marsit. Bajram Kelmendi, juristi i shquar dhe avokat aktiv në Këshillin për Mbrojtjen e të Drejtave dhe Lirive të Njeriut, u rrëmbye nga shtëpia bashkë me dy djemtë e tij, Kastriotin dhe Kushtrimin, nga policët serbë që i hynë dhunshëm në shtëpi në natën e 24 marsit 1999. Më 26 mars, ata u gjetën të vrarë”, ka shkruar Kurti.
Ai më tej shtoi se vepra e tyre nuk shlyhet prej kujtesës dhe historia e aktiviteti i tyre intelektual, si dhe angazhimi i tyre politik do të ruhet ndër breza.
“E përkujtojmë dhe e ruajmë historinë e aktivizmit intelektual dhe angazhimit politik të veprimtarëve tonë ndër breza. I përjetshëm qoftë kujtimi për Agim Hajrizin, Latif Berishën dhe Bajram Kelmendin! Lavdi të gjithë atyre që u vranë nga Serbia pushtuese, në rrugëtimin tonë për lirinë e Kosovës!”, ka shkruar në fund kryeministri Kurti. /Kosovatimes/
