Presidentja Vjosa Osmani në ceremoninë përkujtimore të 25-vjetorit të Masakrës së Krushës së Madhe, ka thënë se inagurimi i muzeut njësojë sikurse liria, janë rezultat i sakrificës së popullit shqiptar.
“Sot ne po inagurojmë muzeun që s’është kujtim vetëm për viktimat, por është gardiane e së vërtetës për brezat që do të vijnë pas nesh. Kjo pasi është dëshmi e vendosmërisë sonë kolektive për ta mbrojtur të vërtetën e luftës sonë çlirimtare, dinjitetin e shtetin tonë. Krimet e luftës dhe gjenocidi me të cilën synohej shfarrosja e popullit shqiptar të Kosovës nga regjimi i Millosheviqit, asnjëherë nuk vjetërohen, ndaj asnjëherë nuk ndalojmë së kërkuari që autorët të vihen para drejtësisë”, ka thënë ajo.
“Muzeu i mizorive është një testmanent i një prej kapitujve më të errët të historisë sonë nga lufta e fundit. Ky muze është në funksion të formësimit të kujtesës tonë kolektive, nderimit të viktimave e mbi të gjitha në funksion të thirrjes sonë të përbashkët për drejtësi, e cila akoma mungon”, ka deklaruar ajo.
Osmani ka thënë, se zërat e viktimave nuk do të heshten e as harrohen nëpërmjet dokumentimit me rastin e inagurimin e këtij muzeu.
“Familjet e këtyre viktimave dhe Kosova kanë nevojë për drejtësi sepse ky është parim themelor mbi të cilën duhet të funksionojë secila shoqëri, e pa të cilën paqja asnjëherë nuk është e drejtë”, ka thënë Osmani.
Haxhiu: Muzeu do t’i kontribuoj kujtesës kolektive për gjenocidin e Serbisë
Ministrja e Drejtësisë, Albulena Haxhiu, ka thënë se nëpërmjet inagurimit të masakrës së Krushës së Madhe ruhet kujtesa kolektive për gjenocidin e Serbisë në Kosovë.
“Ky muze do t’i kontribuoj kujtesës sonë kolektive për të mos harruar asnjëherë krimet mizore dhe aktet gjenocidale të Serbisë fashiste”, ka thënë ajo.
“Së fundmi kemi themeluar Institutin për dokumentimin dhe hulumtimin e krimeve të kryera gjatë luftës së fundit në Kosovë, në të cilën do të dokumentohen të gjitha masakrat dhe krimet e tjera që janë kryer në Kosovë”, ka shtuar Haxhiu.
Latifaj: Muzeu i Krushës së Madhe – tregues i çmimit për liri
Kryetari i Rahovecit, Smajl Latifaj, në ceremoninë përkujtimore të 25-vjetorit të Masakrës së Krushës së Madhe, ka thënë se inagurimi i muzeut që dokumenton këtë ngjarje, është tregues i çmimit të Kosovës për liri.
“Ky muze do të trokas në ndërgjegjen tonë dhe të atyre që vijnë pas nesh, duke na treguar çmimin e lartë që kemi paguar për lirinë e tokës sonë”, ka thënë ai.
Ai ka thënë se mbi 140 të vrarët e personat e zhdukur nga kjo masakër kanë pësuar vetëm për shkak të etnisë së tyre shqiptare.
“Masakra e Krushës së Madhe është një nga masakrat më masive që u bë nga paramilitarët, policia dhe ushtria e shtetit terrorist të Serbisë. Për fare pak kohë, u dogjën 850 shtëpi, u shkatërrua baza materiale e shumë fshatarëve, u asgjësuan monumentet e trashëgimisë kulturore e historike dhe u rrënua gjithçka që lidhej me trashëgiminë tonë kombëtare”, ka thënë ai.
Ka nisur ceremonia përkujtimore e njërës prej masakrave më të mëdha në Kosovë, asaj të Krushës së Madhe të Rahovecit, në 25-vjetorin e ngjarjes.
Në ceremoni po marrin pjesë personalitete të rëndësishme publike duke përfshirë edhe presidenten Vjosa Osmani.
Gjatë ceremonisë do të bëhet edhe përurimi i Muzeut të Masakrës Krushë e Madhe, me mbi 200 rrëfime gojore të masakrës së 26 Marsit, 1999.
