Një grabitje e armatosur ka ndodhur sot rreth orës 12:20 në rrugën “Sali Çekaj” në Ferizaj.
Rastin për RTKlive e ka konfirmuar zëdhënësi i Policisë Rajonale të Ferizajt, Kanun Veseli.
Ai ka thënë se një këmbimore, e cila gjendet në këtë rrugë u grabit nga një i dyshuar i maskuar dhe nën kërcënimin e armës së zjarrit.
Sipas tij dyshohet se aty janë grabitur rreth 30 mijë euro.
“Me datën 27.03.2024 rreth orës 12:20 kemi pranuar një informacion se në një këmbimore, e cila gjendet ne rrugën” Sali Çekaj” në Ferizaj, dyshohet se një person i maskuar dhe nën kërcënimin e armës së zjarrit ( pistoletë) arrinë të marrë (grabitë)një shumë të caktuar të parave dhe të largohet në drejtim të panjohur”, deklaroi Veseli për RTKlive.
“Menjëherë ekipe të policisë, policë të rendit, hetues të stacionit, si dhe hetuesit dhe krimteknikët rajonal kanë dalë në vendin e ngjarjes dhe kanë marrë masat e nevojshme të hetimit për identifikimin dhe kapjen e të dyshuarit e kësaj ngjarje”, tha tutje Veseli.
Ai tha se për të gjitha këto veprime është njoftuar edhe prokurori kujdestar nga Prokuroria Themelore në Ferizaj.
Tutje Veseli njoftoi se në momentin e grabitjes ka qenë duke punuar një punëtor, i moshës 30 vjeçare dhe se nuk raportohet për lëndime.
“Dyshohet se janë grabitur rreth 30 mijë euro. Për informata tjera do të njoftoheni me kohë”, ka thënë tutje Veseli.
