Sot është konstituuar Komisioni Hetimor Parlamentar lidhur me nivelin e menaxhimit të marrëdhënies së punës së anëtarëve të shërbimit të jashtëm dhe zyrtarëve të Ministrisë së Punëve të Jashtme dhe Diasporës.
Time Kadrijaj, anëtare e komisionit, tha se në këtë mbledhje ka mungesë të anëtarëve të komisionit për shkak të vizitave të tyre jashtë vendit.
Ky komision përbëhet nga 11 anëtarë, kurse gjashtë ishin të pranishëm.
Deputeti Haxhi Avdyli, po ashtu anëtar i këtij komisioni, tha se ky grup po formohet në ditën kur Kosova po shënon rezultate shumë të mëdha në fazën përfundimtare në anëtarësimin në Këshillin ë Evropës.
Haxhiu lavdëroi edhe lobimin e ministres Gërvalla.
“Donika Gërvalla, ministre e Punëve të Jashtme dhe Diasporës, po bën një punë të mirë. Për herë të parë Ministria e Punëve të Jashtme dhe e Diasporës është duke kryer punë shumë të mëdha, siç është liberalizimi i vizave, avancimi i Kosovës në Asamblenë e NATO-s, tash edhe në Këshillin e Evropës”, shtoi ai.
Ndërkaq Time Kadrijaj tha se opozita ka lobuar çdoherë për avancimin e anëtarësimit të Kosovës në Këshill të Evropës dhe shtoi se “asnjë hezitim nuk e ka pasur asnjë deputet i opozitës për ta ndihmuar Kosovën në avancimin për anëtarësim në KE”.
