Profesori i njohur amerikan, Daniel Serwer, ka shfaqur frikën se Shtetet e Bashkuara të Amerikës i kanë premtuar Serbisë themelimin e Asociacionit të komunave me shumicë serbe.
“Kam frikë se amerikanët i kanë premtuar Asociacionin Beogradit dhe nuk duan të marrin përgjegjësi nëse nuk ndodh. ShBA nuk është në Këshillin e Evropës, por ndikimi i saj do të jetë i fortë mes disa prej shteteve evropiane, përfshirë Francën”, ka shkruar Serwer në platformën X.
Ai ka reaguar në një postim të ish-ministrit të Punëve të Jashtme, Petrit Selimi. Ky i fundit pasi Kosova kaloi sfidën e parë për t’u bërë anëtare e Këshillit të Evropës tha se shpreson që Asociacioni nuk do të jetë kusht për anëtarësim.
“Kosova kaloi një standard të rëndësishëm me 90% të votave. Shumë më tepër se ç’duhej. Hapi tjetër është votimi i plotë në PACE. Hapi i fundit, më i rëndësishëm është votimi nga ministrat evropianë. Shpresojmë që Asociacioni të mos jetë një kusht i vështirë për këtë votim përfundimtar, pavarësisht disponimit aktual në ShBA dhe Francë”, ka thënë Selimi.
