Këshilli Gjyqësor i Kosovës, po planifikon shtrenjtimin e taksave gjyqësore. Për këtë ka hartuar një draft-udhëzim, bashkë me propozimin për shtrenjtimin e taksave, në raste deri në pesëfish. Shtrenjtimi i madh i taksave mund të pengojë qasjen e qytetarëve në drejtësi, thonë nga shoqëria civile e avokatë. Nga KGjK-ja kanë treguar për Radio Kosovën se kur mund të hyjë në fuqi udhëzimi i ri.
Nëpërmjet një udhëzimi të ri administrativ, Këshilli Gjyqësor i Kosovës po synon shtrenjtimin e taksave. Në Draftin e Udhëzimit Administrativ për Unifikimin e Taksave Gjyqësore, vërehet rritje e taksave pothuajse në të gjitha kategoritë. Ngritja e tarifave, ashtu siç është propozuar nga KGjK, mund të ketë ndikim negativ dhe të pengojë qasjen e qytetarëve në drejtësi, thonë për Radio Kosovën nga shoqëria civile e avokatë.
Shefki Berisha, hulumtues në organizatën “AVONET”, thotë se krahasuar me udhëzimin administrativ të vitit 2017, që aktualisht është në fuqi, vërehet një ngritje e madhe e taksave gjyqësore.
“Për një padi civile që fillon nga 20 euro, po planifikohet përmes këtij udhëzimi të ri që taksat të shkojnë deri në 100 euro. Kemi edhe padi të tjera e taksa për shërbime të tjera që shkojnë në vlera edhe më të larta. Kemi deri në pesëfishim të vlerës monetare për ushtrimin e këtyre mjeteve juridike. Këto taksa, ka shumë mundësi reale që të jenë të pamundshme për t’u mbuluar nga qytetarët e kjo padyshim se do t’i privojë ata nga të drejtat e tyre juridike”, tha Berisha.
Se tarifat e reja të propozuara nga KGjK janë të larta, e thotë edhe avokati Arbër Jashari, sipas të cilit do të ishte mirë që në Kuvendin e Kosovës të miratohej një ligj për këto taksa.
“Ngritja e propozuar nga KGjK-ja është tepër e lartë dhe kjo e vështirëson tej mase qasjen e qytetarëve në drejtësi, duke pasur parasysh koston e jetesës dhe krizën ekonomike. Nga ana tjetër, është jashtë çdo logjike dhe çdo standardi që rritja të bëhet aq shumë, krahasuar me tarifat e vjetra, sepse në raste të caktuara kemi rritje deri në pesëfish”, tha ai.
Radio Kosova ka pyetur KGjK-në në lidhje me arsyet e ndryshimit dhe shtrenjtimit të tarifave gjyqësore, të parapara me draftin e propozuar. Nga KGjK kanë thënë se “ndryshimet ligjore që kanë ndodhur që nga hyrja në fuqi e Udhëzimit Administrativ për Unifikimin e Taksave Gjyqësore në vitin 2017 kanë sjellë nevojën për ndryshim të këtij udhëzimi. Një draft fillestar është përgatitur, ndërsa për lartësinë e tarifave do të vendoset nga vetë KGjK-ja”.
“Hyrja në fuqi e udhëzimit të ri administrativ për Unifikimin e Taksave Gjyqësore do të varet nga ecuria e punës së Ministrisë së Drejtësisë në lidhje me nxjerrjen e Ligjit për Taksat Gjyqësore. KGjK-ja do të vlerësojë kohën e përshtatshme për nxjerrjen e këtij udhëzimi, ose eventualisht, nëse ligji për taksa gjyqësore do të nxirret, do të shqyrtojë mundësinë e nxjerrjes së një udhëzimi administrativ të ri, në drejtim të zbatimit të Ligjit për Taksat Gjyqësore”, kanë thënë në një përgjigje me shkrim nga KGjK-ja.
