Qentë janë në gjendje të kuptojnë disa fjalë që iu referohen objekteve në mënyrë të ngjashme sikurse njerëzit, gjeti një studim që ka analizuar valët në trurin e qenve, duke ofruar dëshmi mbi mënyrën se si funksionon truri i shokut më të mirë të njeriut.
Qentë janë në gjendje të njohin fjalë që nxisin ata të bëjnë veprime dhe kjo nuk është befasi për pronarët e qenve, të cilët u thonë kafshëve të tyre shtëpiake të “ulen” apo “të kapin topin”.
Megjithatë studimi, që ka analizuar aktivitetin e trurit të 18 qenve, ofron të dhëna se ata mund të aktivizojnë kujtesën e tyre për një objekt kur të dëgjojnë emrin e tij.
Studimi u krye nga Universiteti Eotvos Lorand në Budapest dhe u publikua në revistën, Current Biology.
“Ka pasur një debat të kamotshëm të aftësive jonjerëzore të kafshëve për të kuptuar fjalët në mënyrë referenciale”, tha Marianna Boros, bashkëautore e studimit.
“Përderisa ka pasur raportime për sjelljen, gjithmonë kanë qenë raste të veçanta. Studimi ynë është i pari që ne pretendojmë se kjo krijesë ka kapacitete të gjera”.
Gjatë studimit, pronarët e qenve thanë fjalët për objektet që kafshët e tyre shtëpiake i njihnin. Pastaj, në disa raste ata iu treguan qenve një objekt që përkonte me fjalën, ndërkaq në raste të tjera fjalët nuk përkuan me objektet.
Studimi gjeti se ka aktivitet në trurin e qenve kur fjalët përkonin me objektet ishin të ndryshme me ato kur nuk përkonin. E njëjta gjë vërehet edhe në trurin e njeriut.
“Qentë mund të kuptojnë se fjalët përkojnë me diçka… Prandaj, ata aktivizojnë paraqitjet mendore dhe i lidhin me kuptimin e fjalëve për atë paraqitje mendore dhe jo vetëm me kontekstin”, tha Boros.
Hulumtuesit kanë në plan që të hetojnë nëse ky kuptim i gjuhës referenciale është specifik vetëm për qentë, apo këtë aftësi e kanë edhe kafshët e tjera.
