Kryetari i Bashkimit Demokratik për Integrim, Ali Ahmeti është shpallur qytetar nderi i Prizrenit, në një ceremoni të Kuvendit të Komunës.
Në këtë seancë morën pjesë figura të ndryshme publike, teksa u vlerësua kontributi i Ahmetit për çështjen kombëtare ndër dekada.
Të gjithë folësit në këtë seancë solemne deklaruan se ish-anëtari i Shtabit të Përgjithshëm të UÇK-së dhe ish-lideri politik i Ushtrisë Çlirimtare Kombëtare, për 40 vite ka qenë në funksion të çështjes kombëtare, fillimisht në Kosovë dhe pastaj edhe në Maqedoninë e Veriut.
Ndërkaq, Ali Ahmeti, aktualisht kryetar i BDI-së, u shpreh i nderuar me këtë titull.
Ai me këtë rast tha se Lidhja e Prizrenit e ka mbajtur gjallë shpirtin e shqiptarëve.
“Na e ka mbajtur shpirtin gjallë sepse na ka mësuar se si të mos dorëzohemi dhe të ndërtojmë program deri në çlirim, sepse vet Lidhja e Prizrenit ishte një platformë për çlirimin e tokave shqiptare”, tha ndër të tjera Ahmeti.
E kryetari i komunës së Prizrenit, Shaqir Totaj, tha se prania e Ali Ahmetit me familjen dhe bashkëpunëtorët e tij e ka nderuar Prizrenin, teksa tha se do të vazhdojnë të nderojnë njerëz të kalibrit të tillë.
