Edicioni aktual i Kupës së Gjermanisë është një histori më vete pasi në gjysëmfinale është vetëm një skuadër e Bundesligës. Kështu mbrëmjen e kaluar Kaizerslauterni me fitoren e arritur përballë Sarbrykenit preu e para biletën për finalen e madhe të Berlinit. Sot do të luhet takimi i dytë mes Bajer Leverkusenit dhe Fortunës së Dyseldorfit.
Për finalistët e parë duhet thënë se në këtë sezon po përjetojnë emocione të forta pasi edhe pse janë në finale të Kupës ende nuk dinë nëse vitin që vjen do të jenë pjesë e Bundesligës 2.
E gjithë kjo situatë e ndërlikuar nuk i pengon të ëndërrojnë për Europën. Siç dihet fituesit e Kupës së Gjermanisë do të kualifikohen në fazën e grupeve të Ligës së Europës. Triumfi më 25 maj në Berlin është mënyra e vetme për ekipin e Lauternit që të jetë në kupat e Europës vitin që vjen.
E njëjta gjë vlen edhe për Fortunën e Dyseldorfit. Rregulli sipas të cilit edhe e mundura e finales mund të shkonte në kupat e Europës nuk është më.
Nëse Leverkusen, e cila ka siguruar një vend në Champions, do të fitonte Kupën e Gjermanisë atëherë në Ligën e Europës do të shkonte vendi i gjashtë në Bundesligë. Pozicion ky që zakonisht të dërgon në Ligën e Konferencës. Në rast se Leverkusen fiton Kupën atëherë vitin që vjen vendi i shtatë në Bundesligë do të jetë pjesë e Ligës së Konferencës.
Nëse Leverkusen fiton Ligën e Europës atëherë Gjermanisë nuk i shtohet asnjë vend në Ligën e Kampioneve. Vendi në Champions që i takon fitueses së Ligës së Europës i shkon një skuadre, e cila do të jetë në turet eliminatore.
Në sezonin 2004/05, Alemannia Aahen, u kualifikua në Ligën e Europës si humbëse e finales së Kupës së Gjermanisë. Ajo ishte hera e fundit kur një skuadër e Bundesligës së Dytë mori pjesë në kupat e Europës.
Përpara tyre klubi i vetëm, i cili nuk ishte pjesë e Bundesligës, por që mori pjesë në kupat e Europës ishte BSG Stahl Eisenhüttenstadt. Në edicionin 1991/92 formacioni i divizionit të tretë mori pjesë në Kupën e Kupave.
