Rreth 53,000 civilë u larguan nga zona metropolitane Port-au-Prince midis 8 dhe 27 marsit për shkak të dhunës që shpërtheu gjatë fundjavës së Pashkëve, thanë sot Kombet e Bashkuara.
Shefi i OKB-së për të drejtat e njeriut Volker Turk tha se shkelje të të drejtave të njeriut “të pashembullta në historinë moderne të Haitit” kanë ndodhur në Haiti, duke përfshirë vrasje, rrëmbime dhe dhunë seksuale, raporton Reuters.
Për shkak të konflikteve intensive, transporti i nevojave kryesore dhe ndihmave humanitare për në kryeqytetin e atij shteti ishull u bllokua. Sipas OKB-së, shumë civilë të zhvendosur u drejtuan për në gadishullin në jug të vendit, i cili ende po shërohet nga një tërmet shkatërrues në 2021.
Ndërsa vendet fqinje forcojnë kufijtë e tyre detarë, vetëm katër përqind e Haitianëve kanë thënë se duan të emigrojnë, kryesisht në Republikën Domenikane, e cila ndan ishullin Hispaniola me Haitin.
Megjithatë, qeveria e Republikës Domenikane rriti sigurinë e saj kufitare si masë paraprake dhe deportoi mijëra refugjatë përtej kufirit. Aleancat e bandave të fuqishme po kërkojnë të marrin pjesë të kryeqytetit që nuk i kanë vënë ende nën kontrollin e tyre dhe i kanë shpallur “luftë” qeverisë, kryeministri i së cilës njoftoi dorëheqjen më 11 mars teksa ishte në SHBA.
Kryeministri Ariel Henry fillimisht pritej të zëvendësohej brenda ditëve pas dorëheqjes së tij të shpallur nga një këshill presidencial kalimtar i formuar nga përfaqësues të partive politike dhe organizatave të shoqërisë civile të propozuar nga liderët rajonalë në Xhamajka.
Por tre javë më vonë, krijimi i këshillit presidencial nuk ka ndodhur ende mes përleshjeve të brendshme, kërcënimeve dhe dorëheqjeve.
