Unioni i Gazetarëve Shqiptarë denoncon shpeshtimin e rasteve të sulmeve kibernetike mbi media të ndryshme online, si dhe arkivat e organizatave të ndryshme mediatike të cilat investohen për raportime të thelluara dhe investigime. Redaksia e Citizens Channel njofton se po përballet me një sulm të organizuar kibernetik. Pas heqjes së qindra postimeve nga “Facebook” edhe webi zyrtar i kësaj organizate vihet nën sulm.
Më herët disa prej redaksive të mediave online të vendit, kanë denoncuar hakerimet dhe mësymjet kibernetike mbi webet e tyre.
UGSH i vlerëson këto denoncime si përpjekje me botën anonime të krimit kibernetik, të grupeve të korruptuara dhe sidomos të abuzantëve publikë të cilët janë ose pjesë ose bashkëpunëtorë me korrupsionin dhe krimin e organizuar në hapësirën e vendit.
UGSH u drejtohet organeve ligjzbatuese të vlerësojnë seriozisht krimin kibernetik në vend dhe strukturat e hakeruesve të cilët përveç goditjeve tronditëse mbi shërbimet publike online në Shqipëri, së fundi, po shpeshtojnë rastet e goditjeve edhe mbi media dhe hapësirën e lirë të publikimeve në hapësirën virtuale.
Sulmet kibernetike mbi mediat e reja janë agresion mbi lirinë e publikimeve dhe marrëdhënien e publikut me raportimet e thelluara dhe sidomos imvestiguese.
Ndërhyrje të tilla bashkëshoqëruar me ndotjen e pazakontë etike në rrjetet sociale dhe shumë të ashtuquajtura online anonime, janë rreziku më i madh dhe me risqe të shumta për besueshmërinë dhe ndikimin publik.
