Deputeti i LDK-së, Avdullah Hoti, ka akuzuar Qeverinë Kurti për shpenzim të pakontrolluar të buxhetit.
Ai tha se qeveria po paguan e paguan një ndërmarrje publike, aktiviteti i së cilës, sipas Hotit, ka qenë i lidhur me projektin e Termocentralit “Kosova e Re”, projekt i cili është anuluar.
Hoti tha se nga qeveria janë ndarë 200 milionë euro për ndërmarrjet publike, para për të cilat pati pyetje për ministrat, por që të njëjtit nuk ishin prezentë në seancë.
“Pyetjet janë substanciale për mënyrën se si po shpenzohet buxheti i shtetit. Janë mbi 200 milionë euro që janë ndarë për ndërmarrjet publike poshtë e lartë e edhe për një ndërmarrje publike që ka qenë e lidhur me projektin e Termocentralit “Kosova e Re”, por që është anuluar ai projekt dhe ajo ndërmarrje vazhdon të paguhet”, tha Hoti, njofton Klankosova.tv.
Ndërmarrja për të cilën bëhet fjalë është Ndërmarrja e Re Energjetike e Kosovës “NKEC”, e cila ishte themeluar në vitin 2018 si ndërmjetësuese për energjinë elektrike mes Qeverisë së Kosovës dhe “Contour Global”, e cila kishte për detyrë ndërtimin e Termocentralit “Kosova e Re”.
