Kryetari i Partisë Demokratike të Kosovës, Memli Krasniqi ka kujtuar masakrën e Rezallës, në të cilën u vranë 98 civilë shqiptarë.
Krasniqi e ka quajtur këtë masakër si krim gjenocidal serb e për të cilin ekzekutorët ende nuk kanë dalë para drejtësisë.
“Burim Zabeli, 13 vjeç, po refuzonte t’i ndahej babait të tij, Xhemajlit, i cili kishte probleme me shikim. Dhe ashtu, dorë për dorë, pranë një lisi, kriminelët serbë i pushkatuan të dy. Trupat e Burimit dhe Xhemajlit u gjetën vetëm disa vite pas vrasjes në një varr masiv në Serbi – pasi aparati kriminal shtetëror, në mënyrë të orkestruar, kishte provuar t’i zhdukë trupat. 98 civilë shqiptarë, të të gjitha moshave, u vranë mizorisht në Rezallë me 5 prill të vitit 1999. Nuk u kursye askush. As fëmijët dhe as të moshuarit. Edhe për këtë masakër, sikur për shumë të tjera që ka kryer regjimi gjenocidal serb, ende s’kanë dalë para drejtësisë urdhërdhënësit dhe ekzekutorët”, ka shkruar Krasniqi në Facebook.
Ai tutje ka thënë se mbi sakrificën e dëshmorëve dhe martirëve qëndron liria dhe pavarësia e Kosovës. /Kosovatimes/
